يامرحبا ترحيبة الارض بالسيل    باللي صلاة الفجر جاني سلامه



مرسال ماهو مثل باقي المراسيل    من واحد ن عندي عزيز ن مقامه



مشكور ياغالي على القلب بالحيل    ياجامع ن ثنتين :طيب و قرامه



ماهمني لو هو لحقني بهاذيل    أسوق رجلي ماخشيت الملامه



اسرح صلاة الصبح واسري مع الليل     الساحل الشرقي يصافح تهامه



امشي على درب ن مشوه الرجاجيل    وزومان لاجل الرزق مرخي خطامه



ماتتعب متوني من الحط والشيل    طبع ن تغذى من خوال وعمامه



وعن خدمة بلادي فلا فيه تاجيل    ولاخير في رجل ن يخلي مهامه



اتبع طموح ن من ورى الجدي وسهيل    فيه التميز والعطى والزعامه



وان عيت الخيره فما في يدي حيل    قانع بحكم الله وسامع كلامه



غني من فضله ولو مالي قليل    والرجل مايبغى يكود السلامه



عساه ينجيني نهار التهاويل    لامنَ وقَفنا عرايا امامه

جميع الحقوق محفوظة لــ ناصر بن هذال

http://www.naaser.net/