أحدن على الدنيا حباله تقصص      واحدن حباله بالشواهيق مربوطه



واحدن لماله يجمع الربع والنص      واحدن لماله مايحسب هبوطه



واحدن هروجه لاتزيد وتنقص      واحدن هروجه وافياتن شروطه



واحدن على الشدات خايف ومنغص      واحدن على الشدات سرجه وقوطه



يقولها اللي بالتجارب تحرص      شاف المناكر والمراجل صعوطه

الشاعر/عبدالرحمن بن ناصر



****

علـى النـدا جينـا نغنـي ونرقـص    نبدع قصيـد واضحـات(ن) خطوطـه



خمسة بيوت(ن) مثل عقد(ن) مرصص    نعدهـا مـثـل التويـجـر لنـوطـه



غالي بنات الفكـر لجلـك بترخـص    ومن لاقـدر فيهـا بنعلـن سقوطـه



ياصاحبي في الناس نـاس تلصـص    وناس صعيب العلـم تقـدر تسوطـه



وهذاك حـال النـاس لا لا تخصـص    طنش تعش وانس الزمان وضغوطـه

جميع الحقوق محفوظة لــ ناصر بن هذال

http://www.naaser.net/